ნაშრომი გარდამავალი ეკონომიკის პირობებში საქართველოს კომერციული ბანკების ფუნქციონირების პრობლემებზე დაწერილი პირველი კომპლექსური მონოგრაფიული გამოკვლევაა. მასში განხილულია კომერციული ბანკების როლი საბანკო სისტემის განმტკიცებასა და ეკონომიკის ნორმალურ ფუნქციონირებაში, მათი ჩამოყალიბებისა და განვითარების კანონზომიერებანი.
      გაანალიზებულია კომერციული ბანკების რესურსებით უზრუნველყოფის რეგულირების აუცილებლობა.
      განხილულია ფაქტორინგული ოპერაციები, მათი მნიშვნელობა, ეკონომიკური მხარე და განვითარების პერსპექტივები საქართველოში.
      საკმაო სიღრმითა და სისრულითაა გადმოცემული კომერციული ბანკების მდგრადობისა და საიმედოობის განმსაზღვრელი პირობები, ფაქტორები, მაჩვენებლები და მეთოდიკა, მენეჯმენტის როლი ბანკის საიმედოობისა და მდგრადობის განმტკიცებაში.
      განსაზღვრულია საქართველოში დეპოზიტების დაზღვევის სისტემის შექმნის პრინციპები, მიმართულებები და დაზღვევის ფონდის ფორმირების წყაროები.
      შესწავლილია კომერციული ბანკების ლიკვიდობის რეგულირების საკითხები და ლიკვიდობის ეკონომიკური ნორმატივები, სხვადასხვა ქვეყნების მაგალითზე მოცემულია ლიკვიდობის რეგულირების გამოცდილების დახასიათება.
      შესწავლილია ბანკების მიერ საინვესტიციო ფუნქციების განხორციელების როლი და მნიშვნელობა ქვეყნის საბაზრო ეკონომიკაზე გადასვლის პერიოდში.
      გადმოცემულია კომერციული ბანკების საქმიანობის კომპლექსური შეფასებისათვის ფინანსურ კოეფიციენტთა სისტემის სრულყოფის საკითხები.
      შესწავლილია საქართველოს კომერციული ბანკების სანაციის ინსტიტუტის ჩამოყალიბების საკითხი, განსაზღვრულია ამ ინსტიტუტის ფუნქციები და მათი სრულყოფის გზები, აგრეთვე საბანკო საქმიანობისათვის დამახასიათებელი სხვა მნიშვნელოვანი და დღეისათვის აქტუალური პრობლემები.

    პროფესორი ირაკლი კოვზანაძე არის 50-ზე მეტი სამეცნიერო ნაშრომის ავტორი მათემატიკასა და ეკონომიკაში, მათ შორის ოთხი მონოგრაფიისა:

  1. "მეზოკომპაქტური სივრცეების განზომილების თეორიის ზოგიერთი საკითხის შესახებ" (1990, რუსულად);

  2. "საქართველოს კომერციული ბანკების ფუნქციონირების პრობლემები თანამედროვე ეტაპზე" (2001, ქართულად, რეზიუმე ინგლისურ და რუსულ ენებზე);

  3. "სისტემური საბანკო კრიზისები ფინანსური გლობალიზაციის პირობებში" (2003, რუსულად, რეზიუმე ინგლისურად);

  4. "ტრანსფორმაციული ქვეყნების ეკონომიკისა და საბანკო სისტემის განვითარების ტენდენციები და პერსპექტივები" (2005, რუსულად, რეზიუმე ინგლისურად).

     ავტორის მიერ გაკეთებულია მოხსენებები ზემოაღნიშნულ საკითხებთან დაკავშირებით შემდეგ კონფერენციებზე:

  1. ლატვიის სახელმწიფო უნივერსიტეტის 47-ე სამეცნიეო კონფერენცია (რიგა, ლატვია, 1988);

  2. საშემოდგომო სკოლა, "ტოპოლოგიის გამოყენება ალგებრასა და დიფერენციალურ გეომეტრიაში" (ტარტუ, ესტონეთი, 1988);

  3. სემინარი ზოგად ტოპოლოგიაში პროფესორ ა. არხანგელსკის ხელმძღვანელობით ლომონოსოვის სახელობის მოსკოვის სახელმწიფო უნივერსიტეტში (მოსკოვი, რუსეთი, 1989);

  4. ლონდონის უნივერსიტეტის საერთაშორისო საბანკო და ფინანსური სკოლა (ლონდონი, დიდი ბრიტანეთი, 2000);

  5. მსოფლიო ბანკის კონფერენცია "ზედამხედველობა, მენეჯმენტი და ფინანსური რისკების შეფასება" (ვაშინგტონი, აშშ, 2003).

     ავტორს გააჩნია საბანკო სისტემაში პრაქტიკული მოღვაწეობის მრავალწლიანი გამოცდილება. ამავე დროს იგი არის ი. ჯავახიშვილის სახელობის თბილისის სახელმწიფო უნივერსიტეტის პროფესორი.

     ამჟამად ირაკლი კოვზანაძე არის საქართველოს პარლამენტის საფინანსო-საბიუჯეტო კომიტეტის თავმჯდომარე.